Modi leh Australia PM-in virtual summit nei dawn

Prime minister Narendra Modi leh Australia prime minister Scoot Morrison chuan vawiin hian a ṭum khatna atan Virtual Leaders Summit an nei dawn. 

Summit-ah hian ram pahnihte thawhdunna hrang hrangte an puan rin a ni a, heng zingah hian Indo pacific-a India leh Australia sipaite thawhdunna tur, Mutual Logistics Support Arrangement (MLSA) pawh a tel rin a ni. 

Ram hruaite pahnihte hi a hmain ṭum li an lo inhmu tawh a, thawhdunna ṭha leh zau zawk siam dan turte an lo sawidun tawh ṭhin. 

Vawiina summit neih turah hian Covid-19 vanga harsatna thleng mek chungchangte pawh an sawidun dawn a, science leh technology lama thawhdunna zau zawk  neih dan tur te, cybersecurity lama thawhdunna nghet zawk neih dante pawh an sawi ang. 

Security leh defence lamah India leh Australia hian thawhdunna ṭha tak an nei a, kum 2015 aṭang khan naval exercise 'AUSINDEX' pawh an lo buatsaih tawh a ni. Australia PM hi kumin January thlaa India rama rawn zin tum a ni a, mahse hetih lai hian an ramah ram nasa taka a kan avangin a ṭhulh a, a hnuah hri leng avangin a zin chhuak zui thei ta lo a ni.