Republic Day atan fimkhur turin chah

Pakistan Inter-Services Intelligence leh an thurualpuiten January 26-a India Republic Day lawmna tibuai tura pawikhawihna thlen turin firfiakte an fuih nia thu an dawn avangin, intelligence agency chuan state hrang hrangte chu fimkhur turin a chah.

Intelligence lam chuan ISI leh an thurualpui, Pakistan-a firfiak pawlte chuan an hnuaia pawl hrang hrangte chu Republic Day tibuai tura pawikhawihna an thlen loh chuan an hnena ṭanpuina sum an pek ṭhin pawh tihtawpah an vau niin a sawi. ISI hian tun hnaiah army senior official leh terrorist commander-te chu Rawalpindi-ah meeting a neihpui nia sawi a ni bawk. He meeting-ah hian firfiak pawl lian pahnih - Lashkar-e-Toiba leh Jaish-e-Mohammad-te chuan Jammu and Kashmir-a an mite an chan chhoh zel thu leh, pawi khawih tura an pawl tirh chhuahte an zuai ṭan thu an sawi. Pawikhawihna thlen dan tur tactic thar chungchangte pawh an sawiho niin intelligence lam chuan a tarlang bawk.

An thudawn hi a rintlak tawka ngaiin intelligence agency-te hian Union Home Ministry an hriattir a ni. Hemi hnu hian ministry chuan hmarlam state - Delhi, Punjab, Haryana, Uttar Pradesh, Uttarakhand leh Himachal Pradesh cheif secretary, police director general leh commissioner-te chu hriattirna pein, fimkhur tur leh venhimna lam pawh khauh taka kalpui turin a hriattir.