Mamata-in rel kawng tihtawp tum vangin sorkar sawisel

West Bengal Chief Minister Mamata Banerjee-i chuan sorkar laipuiin West Bengal state chhunga rel kawng pariat tihtawp a tum chu sawiselin, he thil hi politics thil vang niin a puh.

Sorkar laipuiin rel kawng tihtawp a tumte hi Shantipur-Nabadwip Ghat, Baruipur-Namkhana, Sonarpur-Canning, Kalyani-Kalyani Simanta, Ballygunge-Budge Budge, Bhimghar-Palasthali, Barasat-Hasnabad leh Bardhman-Katwa inkar kawngte a ni.

Chanchin thar lakhawmtute a kawmnaah, Banerjee-i chuan state sorkar rawn loa hetiang thutlukna sorkar laipuiin a siam mai chu a hriatthiam loh thu a sawi.

CM chuan Eastern Railways chuan state chief secretary hnenah lehkha thawnin, heng rel kawng pariat enkawlna senso 50% chu state sorkarin tum a inhuam loh chuan kawng hi tihtawp a nih tur thu a sawi a ni, a ti. "Hei hi central sorkar project a ni a, engvangin nge state sorkarin a tum ve a ngaihna chhan?" tiin a zawt let.

Trinamool Congress hotu, Mamata Banerjee chuan sorkar laipui chuan an state-ah project tam tak a titawp tawh tia sawiin, fund a pek pawh eng emaw zat a titawp a ni, a ti. Hei hi thuneihna hmansualna a ni tiin, an enliam mai mai dawn lo tih a sawi bawk.