Thlipui tleh dawn vangin mi 19,000 hmun him lamah sawn

Maharashtra-ah thlipui a tleh dawn vangin mi 19,000 chuang chu hmun him lamah sawn chhuah an ni. Sawnchhuah zingah hian Covid-19 kai enkawl mekte pawh an tel. 

Cyclone Nisarga-in Maharashtra a nuai dawn nia sawi a nih avangin theihtawpin an inbuatsaih lawk a, sorkar chuan tuipui kam leh a bul hnaia kal pawh a khap nghal a ni. Tuipui kam hnaiha awmte chu hmun him lamah sawnchhuah an ni bawk. Khawpui chhunga chengte pawh emergency kit te hman theih tura dah chhuak tur te, tukverh bul hnaia awm lo tur leh, an electric hmanruate chhia a awm leh awm lohte enfiah turin hrilh lawk an ni. 

Tuipui kam hmun hrang hrangah chhanchhuah hna thawktu team-te pawh dah lawk an ni a, Met department chuan cyclone hi darkar khata km 100-a nain a tleh thei dawn niin an sawi. 

Cyclone Nisarga hian nimin chawhnu dar 1 velah khan Maharashtra-a tupui kam hmun ṭhenkhat chu a nuai ṭan tawh a, ruah nasa tak keng telin Mumbai bula Alibaug-ah chuan harsatna a thlen nasa hle. 

Maharashtra bakah hian Gujarat, Daman and Diu leh Dadra and Nagar Haveli-te pawh an inralring nasa hle bawk a ni.