WEF annual meeting hmang turin PM a zin

Prime Minister Narendra Modi-a chu vawiin aṭanga ṭan tur, Switzerland-a resort town, Davos-a World Economic Forum annual meeting hmang turin nimin khan a zin. PM hi Finance Minister Arun Jaitley leh Commerce and Industry Minister Suresh Prabhu-te'n an ṭawiawm.

World Economic Forum (WEF) hi vawiin aṭanga ṭan a ni ang a, meeting hawnni hian PM Modi hian thu a sawi ang. Modi hi India Prime Minister zingah kum sawmhnih chhunga WEF a tel hmasa ber a ni ang. Kum 1997 khan HD Deve Gowda chu a lo tel tawh a ni.

WEF meeting denchhen hian Prime Minister hian Swiss Confederation President Alain Berset bakah sumdawng hotute a kawm dawn a, international business council-ah thu a sawi bawk ang.

Meeting-ah hian ram hrang hrang aṭangin sumdawng, politician, academician leh civil society aiawh mi 3,000 chuang an tel dawn a, meeting hi ni nga chhung neih a ni ang.

WEF meeting-ah hian khawvel ram hruaitu lian eng emaw an tel dawn vangin venhimna pawh a khauh hle a, ram hruaitu 70 chuang tel tur zingah US President Donald Trump leh France President Emmanuel Macron-te pawh an tel.

Meeting neihna, Davos khua hi Graubünden (Canton of Grisons) state-a awm a ni a, meeting neih chhung hian khaw chhungah sipaite bakah sniper-te chu duty tir an ni dawn a, khawpui chhung hmun hrang hrangah security check siam a ni bawk. Meeting chhunga venhim hna thawhna atana sum senso hi Swiss francs maktaduai kua vel tura ruahman a ni.

Meeting neihna tur, Congress Centre leh a chhehvel chu restricted area-ah puan a ni a, hei bakah hian palaite thlenna hotel hrang hrang, Hotel Belvedere, Hilton Hotel leh Intercontinental Hotel leh a bul vel pawh puan tel a ni bawk. Restricted area-a puanah hian a huam chhunga cheng bakah palai, WEF mi leh sa leh accredited media-te chauh kal phal a ni ang. Davos khaw kalpawhna kawngte pawh uluk taka ven an ni dawn bawk.