Republic Day lawm turin inbuatsaih

January 26-a Republic Day lawm turin ram chhung hmun hrang hrangah inbuatsaih mek a ni a, a lawmna pui ber chu New Delhi-a India Gate-ah neih ani ang.

Kuminah Republic Day vawi 69-na lawm a ni dawn a, kum dang ang bawkin India Gate-ah hian parade ropui tak neih a ni leh dawn a ni. Parade-ah hian goverment agency 100 an tel dawn a ni.

Tun ṭumah hian Association of Southeast Asian Nations (ASEAN) hruaitu 10 ten Republic Day lawmna hi hmanpuiin, chief guest 10 an awm dawn a ni. Hengte hi Thailand, Vietnam, Indonesia, Malaysia, Philippines, Singapore, Myanmar, Cambodia, Laos leh Brunei ram hruaitute an ni. Nikum November thlaa ASEAN-India Summit neihah khan Prime Minister Narendra Modi chuan ASEAN hruaitute hi Republic Day lawmna hmanpui tur hian alo sawm tawh a ni.

PM Modi chuan ASEAN hruaitute hi India Gate-ah a lo dawngsawng dawn a, Republic Day parade hi ram pumah public service broadcaster, Doordarshan chuan live-in a pechhuak leh ang. Republic Day hma ni, January 25-ah President Ram Nath Kovind-a thusawi chu tihchhuah a ni bawk ang.

Republic Day lawmna neih tur atan hian ngawrh taka inbuatsaihna kalpui mek a ni a, kumina parade-ah hian Indian Army, Air Force leh Navy-te bakah khualliana sawmte ram aṭangin zirlai 700 chuang an inlan dawn a ni. Border Security Force (BSF) aṭangin hmeichche hlang 113 ten motorcycle stunt an lantir bawk ang.