AAP-in BJP MLA 116 ban turin phut

Aam Aadmi Party (AAP) chuan Madhya Pradesh-a BJP MLA 116-te chu office of profit chelhah puhin MLA an nihna aṭanga ban turin a phut.

Election Commission of India chuan Delhi-a rorellai, AAP MLA 20-te chu Parliamentary secretary-a ruat an nih chungchangah hmun dang aṭanga hlawh lakna, office of profit chelhah puhin ban turin President Ram Nath Kovind hnenah rawtna a lo thlen tawh a ni. President pawhin AAP MLA-te ban tura rawtna thlen hi a pawmpui tawh a ni.

Madhya Pradesh-a AAP convener, Alok Agarwal chuan BJP MLA-ten office of profit an chelh chungchang hi kum khat liamtaaah daih khan an party chuan an lo sawilang tawh a, mahse tun thlengin Election Commission chuan action a la lo a ni, a ti. Hemi chungchang hi MP governor thar hnenah an thlen nawn leh dawn thu leh, ngaih pawimawh hmasaa nei tura an ngen tur thu a sawi.

Agarwal chuan BJP MLA zingah a bikin Paras Jain leh Deepak Joshi-te chuan midang zawng aiin hmundang aṭanga hlawkna an lak hnem thu a sawi. Central-a BJP-in sorkarna a chelh hnuah India ramah dan in ang lo pahnih hman a nih tak thu sawiin, pakhat chu BJP sorkarna state-a hman leh, a dang chu party dang sorkarna state-ah hman a ni, a ti.

AAP hruaitu chan, "BJP sorkar state hrang hrangah chuan MLA-te chuan office of profit post an chelh thei vek a ni. BJP MLA te eiruk phalsakna dan a awm lai hian, BJP eirukna dodaltu, AAP hruaitu rinawm takte hremna dan hran a lo awm ve leh thung a ni" tiin a sawi.

AAP MLA 20-te chuan office of profit post chelha puha, EC-in ban tura President hnena rawtna a thlen chungchangah Thawhṭanni khan Delhi High Court-ah petition an thehlut. President Kovind chuan EC rawtna hi Government of National Capital Territory of Delhi (GNCTD) Act hnuaia Section 15 (1) (a) hnuaiah Pathianni khan a lo pawmsak a, mahse hei hi stay turin AAP MLA-te hian an ngen a ni.

Delhi Deputy Chief Minister Manish Sisodia chuan MLA-te ban tum an nih chungchangah mipuite chu MLA-te thlawp turin a ngen. Sisodia chuan BJP kaihhruai central sorkar chuan Delhi-a AAP sorkar hnathawh dante a tihbahlah sak niin a sawi a, sorkar laipui chuan AAP hotu, Delhi Chief Minister Arvind Kerjiwal-a chu ram pumah a lar chhoh zel avangin a hlauthawng a ni, a ti. Office of profit post chelha puh MLA-te an puhna chu thu dik lo a ni tiin, Parliament Secretary atana ruat an nih avang hian motor, bungalow leh hlawh pek belh an ni lo tih a sawi.