Novel coronavirus: China khualzinte tana Visa pek titawp lailawk

Novel coronavirus darh zel vangin India chuan nimin aṭang khan China mite tana visa pek a titawp.

Beijing Indian Embassy chuan twitter-ah hemi chung­chang hi tarlangin visa pek­chhuah sate pawh a hman theih tawh rih dawn lo tih an sawi. India tlawh duhte chu Beijing embassy leh Guangzhou embassy emaw Shanghai-a Consulate-te emaw visa thar dil turin an ti a, India-a cham mek leh January 15 hnua India tlawhte pawh Ministry of Health and Family Welfare-ah inhriattir turin a ti bawk a ni. Hemi hma hian India sorkar chuan China tana e-visa a pek ṭhin chu a lo titawp tawh bawk.

Air India chuan nimin khan thuchhuah siamin February 8 aṭang hian Delhi-Hong Kong flight an titawp lailawk dawn.

Air India Chairman leh Ma­na­ging Director Ashwani Lohani chuan, "Novel coronavirus din­hmun thlirin Air India chuan Feb­ruary 7, 2020-a Al314 thlawh­tir a nih hnuah Hong Kong flight kan titawp lailawk dawn a ni," tiin a twitter-ah a sawi.

IndiGo pawhin China leh India inkara thlawhtheihna pathum an thlawn tir ṭhin chu an titawp lailawk tawh bawk a ni.

Novel coronavirus an vei ngei a ni tih tihchian tawh mi pathum an awm tawh a, an vai hian Kerala mi vek an ni. Sorkar laipui chuan he hri leng ram chhung hmun hrang hranga enfiah tur hian Group of Ministers (GoM) a din tawh bawk. India-a coronavirus vei tih hmuhchhuah tawhte hi an dinhmuh a ṭha tih sawiin, hri an kai tih lanchhuahna pangai ang chauh anmahniah a la langchhuak tih an sawi.

GoM-ah hian health minister Dr Harsh Vardhan, external affairs minister S Jaishankar, civil aviation minister Har­deep Puri, MoS home G Kishan Reddy, MoS health Ashwini Kumar Choubey leh MoS shipping Mansukh Lal Mandaviya-te an awm a ni.

Kerala sorkar official-te chuan an state mi tunhnaia China-a kal mi 2,239-te chu enfiah an ni tih sawiin, 2,155-te chu in chhuahsan lo tura tih an nih laiin 84-te chu damdawi-inah a bika siam hmunah dah anni tih an sawi bawk.

China-a Wuhan khuaa hmuh­chhuah ṭan, novel coronavirus vanga thi hi an la punbelh zel. Nimin thleng khan he hri leng vang hian  China ramah mi 425 an thi tawh a, hri kai zat finfiah tawh pawh mi 20,438 an tling tawh bawk. Hri kai thar zat hi a hma ni aiin mi 3,235 in an pung a ni. 

China bakah ramdang 20 chuangah darh tawhin, China ram pawna hri vei finfiah tawh hi mi 185 an awm tawh a, Philippines leh Hong Kong-ah mi pakhat ve vein an thihpui tawh bawk.