Covid-19 kai thar 41,506 awm belh leh

India ramah Inrinni khan Covid-19 kai thar mi 41,506 awm belh lehin, Covid-19 vangin mi 895 an thih belh leh bawk. Ramchhungah hripui len tirh aṭang khan Covid-19 vangin mi nuai 4.7 chuang an thi tawh a ni.

Hri kai mek, active case chu nuai 4.54 ah tla thlain, nitin an tlahniam zel. Hri kai tawh aṭanga chhutin hri kai mek chu 1.47% an ni.

Inrinni vek khan dama chhuahtir 41,000 awm bawkin, mi vaibelchhe 2.99 chuan hri hi an dampui leh tawh.

Recovery rate chu 97.20% ah kai chho in, nitina hri kai hmuhchhuah, daily positivity rate chu 2.25% a ni mek a, a zawnin ni 20 chuang 3% hnuai lamah a awm tawh. World Health Organisation (WHO) chuan Covid positivity rate 5% hnuailama awm te chu ram him, safe zone ah a puang.

State ṭhenkhat chuan an state-a luh tur leh vantlang punkhawmna atana khuahkhirhna siamte an thlahdul mek bawk. State ṭhenkhat erawh chuan fimkhur takin khuahkhirhna hi an la kalpui. Tamil Nadu chuan July 19 thleng lockdown an pawtsei leh a, hri kai an tlakhniam hret avangin Pathianniah erawh khuahkhirhna hi tlema thlahdul hret a ni.

Sorkar laipuia Covid task force top official chuan ramchhunga hri leng thawh hnihna chu a la tawp lo tih sawiin, mipuite chu fimkhur chhunzawm zel turin a chah. Health expert-te chuan Covid kaihhruaina dan siamte zawm ṭhat a nih loh chuan hri leng thawh thumna chu lo thleng leh thei a nih thu an sawi.

WHO chief scientist chuan Covid Delta variant darh chak tak vangin khawvel hmun tam takah hri kai an pung thar leh a, hripui hian min kiansan mai dawn lo tih a tichiang niin a sawi.

Inrinni khan vaccine dose nuai 37 semchhuah a ni. Ramchhungah vaccine dose vaibelchhe 37.6 semchhuah a ni tawh tih health ministry chuan a tarlang.

Sorkar chuan kumin chhungin puitling hnenah vaccine pek hman vek a tum. Tun thlengin vaccine pali - Covishield, Covaxin, Russia Sputnik V leh Moderna te chu India rama hman phalna pek an ni tawh.

Delhi-ah hri kai thar 76 awm belh lehin, hri vangin mi pakhat a thi. Positivity rate chu 0.09% ah a tla thla tih health department chuan a puang. Hri kai thar tlahniam zel mah se chief minister Arvind Kejriwal chuan Covid-19 hri leng thawh thumna chu a lo thlen ngei a ring tih a sawi.