EU ram 15-in Covishield green pass pe tawh

European Union member ram 15-te chuan Serum Institute of India siam, Covid vaccine Covishied chu pawmin green pass an pe tawh.

World Health Organisation (WHO) chuan Covishield vaccine hi pawm mah se European Medicines Agency in Europe rama zin turten vaccine an lak tura a tih zingah a telh ve lo a ni. EU in a pawmpui vaccine late chauh hian hri len laia an zin theihna tur, EU Digital Covid Certificate, green pass tih chu an la thei a ni. Green pass hi EU ram hrang hranga zin tur tan neih ngei ngei a ngai tawh a ni.

EMA hian green pass pekna turin vaccine pali chauh a la pawm a, mahse EU member ramte hian a hranin an ram bika kal turte tan vaccine hi pawmin green pass hi an pe thei bawk. Hei vang hian EMA in Covishield hi pawm lo mah se, EU member ram 27 zinga 15-ten an pawm tawh thung .

Sorkar laipui pawhin EU hnenah sorkarin CoWIN portal kaltlanga vaccination pekchhuahte chu pawm tur leh, certificate neite chu an zinna tur hmun an thlenah pawh lo khunghrang kher tawh lo turin a ngen tawh bawk.