Delhi Police-ten Rs vcb 2,500 man heroin an man

Delhi police-te chuan Inrinni khan Faridabad-a in pakhatah heroin cheng vaibelchhe 2,500 hu an man. Heroin an man hi kg 354 niin tum khata heroin man tam ber tum a ni.

Police-te chuan mi pali an man tel bawk a, he thila inhnamhnawih dangte chu chhui zui mek an nih thu official-te chuan an sawi.

Special commissioner of Delhi Police Special Cell, Neeraj Thakur chuan an mi mante hi Afghanistan mi Hazrat Ali, Kashmir mi Rizwan Ahmad, Punjab lam mi Gurjot Singh leh Gurdeep Singh te an ni tih a sawi. Ruihhlo sawngbawlna atana an, chemicals kg 100 chuang an man tel bawk a ni.

Police-te chuan an chhui chianna atangin ruihhloa sumdawnna lian tak kalpuina atan hian ruihhlote hi Afghanistan atangin lakluh niin, Iran-a Chabahar port kaltlangin Mumbai-ah phurh thlen a ni tih an sawi. Hemi hnuah Madhya Pradesh-a Shivpuri bulah sawngbawl turin thawn a ni leh , Afghanistan mi expert-ten an pui a ni. Heta tang hian Delhi, Punjab, Haryana, Rajasthan leh Jammu and Kashmir bakah state dangah pawh an zuar chhuak thin a ni.

An mi mante zingah pakhat chuan ruihhloa an sumdawnnaa a khaipa ber chu Navpreet Singh a nih thu leh, Portugal atangin a rawn enkawl thu a sawi.