India leh Pakistan-in border-a buaina tihreh nan meeting nei

India leh Pakistan border force-te chuan Nimin khan ramri a tunhnaia inkahna thleng chungchanga buaina chinfelna tur ngaihtuahin meeting an nei. Tunhnaia Jammu region Line of Actual Control-a inkahnaah hian India mi 12 velin nunna an chan tawh a ni.

Jammu Frontier Border Security Force inspector general Ram Awtar chuan BSF leh Pakistan Ranger sector commander-level flag meeting chu Jammu district-a RS Pura Sector area-a Octroi post-ah neih a nih thu a sawi.

Pakistan sipai ten January 17-22 inkara Jammu region Line of Control-a silai nasa taka an hmehpuah avang khan BSF pahnih, India sipai pali leh civilian pasarih in nunna an chan a ni.

Line of Control-ah hian January 22 aṭang khan India leh Pakistan hi an inkap leh tawh lo a, mahse state sorkar chuan border area km 5 bial chhunga school zawng zawng chu vawiin thleng hian khar turin thupek a chhuah thung.

Home Department official thuchhuah chuan school hi January 29 hi chuan hawn an nih leh tawh tur thu an tarlang.

January 17-a Pakistan sipai ten India lam an kah avanga hliam tuar zat chu 60 vel an nih thu official-te chuan an sawi a, mi sang tamtak in sahimna zawngin an in an chhuahsana relief camp an pan thu an sawi bawk.

2003-a inkahhai puan a nih hnu khan Pakistan hian vawi 882 lai inkahhai puan hi an bawhchhe tawh a, mi 30 velin nunna an chan phah tawh a ni.