Sorkarin sakhaw thilah inthliarna a nei lo : Suresh Prabhu

Union Minister Suresh Prabhu chuan Nilaini-a World Economic Forum (WEF) summit neihnaa thu a sawiah, India sorkar chuan sakhaw thilah tumah thliar bik a nei lo a, mitinin dikna chanvo ang khat vekin an nei a ni, a ti.

WEF summit-a ‘India’s Role in the World' session-ah telin, minister chuan hmasawnna chuan mitin a thleng phak tur a ni tiin, sorkar laipui chuan hnam leh sakhaw bil huat bik nei ni se, triple talaq bill pawh a pharh lo ang tiin a sawi. Prabhu chuan, "Muslim hi thliarhrang ni ila, Parliament-ah Muslim mipaten awlsam taka an nupuite an ṭhen theihna dan khapna tur, triple talaq bill pawh kan pharh lo ang. India mipui zingah Muslim hi 14% vel an awm a, heng zinga 7% chu hmeichhia an ni. Sakhaw thlei bik nei ni ila, hetianga hmeichhiate humhalhna tur billl hi hautak takin kan pulut kher dawn lo a ni", a ti.

Inthlanah vote zawnna atana sakhua hman chu an thlawp lo tih a sawi bawk. BJP kaihhruai sorkar chu sakhaw thila inthliarna kalpui lo sorkar hmasa ber niin a sawi. India mipui te chuan dikna chanvo ang khat vek an nei a ni, a ti.