Rahul Gandhi ṭhutna pekah Congress lungawi lo

Nimina New Delhi-a Republic Day lawmna inkhawmah Congress Party president Rahul Gandhi ṭhutna siamsakna hmun chungchangah Congress party an lungawi lo hle.

Rahul Gandhi hi tlar hma lamah ṭhutna pek a ni lo a, tlar ruknaah ṭhut tirin, union minister leh BJP senior leader-te awmna aiin mipui vantlang ṭhutna lam a hnaih zawk a ni. Congress Party chuan BJP sorkar thiltih dan chu mak an tih thu sawiin, Republic Day lawmna neih tawhah party hotu a tlar hmaa ṭhuttir a nih loh ṭum khatna a nih thu an tarlang. Hetih lai hian BJP president Amti Shah erawh tlar hmasa berah ṭhuttir a ni thung.

Congress hruaitu Randeep Surjewala chuan BJP sorkar chu politics tenawm taka khelah a puh a, tum vang rengin Congress president hi tlar ruknaah an ṭhuttir a, kalphung lo neih tawhte chu an hnawl vek a ni, a ti. Sorkar thiltih dan chu ram hruaitu dangte hmaah Rahul Gandhi tihzah tumna a ni tiin Congress chuan a sawi. Hei bakah hian BJP kaihhruai sorkar chuan India sorkarin kum tam tak a lo kalpui tawh dan, Republic Day lawmna hmanga ramdang hruaitu rawn kalte eptu party hruaitute nen an inhmuh ṭhin pawh a remti lo niin a sawi bawk.