State, UT leh private hospital-te kutah Covid vaccine dose vbc 1.54 chuang awm

Union health ministry chuan state, UT leh private hospital hrang hrangte kutah Covid-19 vaccine dose vaibelchhe 1.54 chuang a awm mek tih nimin khan a sawi.

Pathianni khan vaccine hi dose nuai 12 vel pek chhuah leh a ni a, ni dang aiin vaccine pek chhuah hi a tlem a ni. Hetih lai hian ram pumah vaccine hi dose 37,73,52,501 pek chhuah a ni tawh thung.

Ram chhunga vaccine pek chhuah mek hi kum 18 leh a chunglamte tan a ni a, kum 12-18 inkarte hnena pek tur, Zydus Cadila siam 3-dose Covid-19 vaccine, ZyCoV-D chu Drugs Controller General of India (DCGI)-in a la pawmsak lo a, tunkar chhung hian a pawmsak hman erawh beisei a ni.

July 1 khan Zydus Cadila hian an vaccine hi pawm turin DCGI-ah hian a ngen tawh a, volunteer 28,000 chuanga an enchhinna Phase-III clinical trial result pawh an thehlut tawh bawk. Data zirchianna lailawk neihah chuan he vaccine hi an himin a rintlak tawk nia ngaih a ni.

DCGI hian Zydus vaccine siam hi a pawm a nih chuan, ZyCoV-D hi India rama Covid vaccine pawm panga-na a ni ang. Covidshield leh Covaxin-te bakah Sputnik V leh Moderna vaccine-te chu pawm an lo ni tawh bawk.

Hri kai thar 37,154 awm belh leh
Ram pumah Pathianni khan Covid-19 hri kai thar 37,154 awm belh lehin, hemi ni vek hian hripui vanga thi mi 724 an awm leh bawk.

Hri kai thar zat hian tlakhniam lam a pan chhunzawm zel a, ni 21 chhung chu a zawnin hri kai hmuh chhuah, positive rate hi 3% hnuai lam a ni tawh a ni. Hri kai mek, active case pawh hri kai hmuh chhuah tawh aṭanga 1.46%-ah a tla thla tawh tih health ministry chuan a tarlang.

Delhi, Haryana leh Tamil Nadu-te chuan hri lengin ziaawm lam a pan tawh avangin khuahkhirhna siamte pawh an thlahdul ṭan tawh a, hemi rual hian hri leng thawh thumna thleng thei a la ni avangin mipuite chu inthlahdah lo a, fimkhur taka awm reng turin an chah. Pathiannia Delhi-a hri kai hmuh chhuah thar chu 56 niin, nikum April thla hnua ni khatah hri kai an tlem ber ṭum a ni.

Nimin thleng khan khawvel pumah Covid-19 hri kai hmuh chhuah chu vaibelchhe 18.67 chuang an tling tawh a, hripui vanga thi hi mi nuai 40.30 an awm tawh bawk.