Jal Jeevan Mission hnuaiah Odisha tan Rs vbc 3,323 ruahman

Sorkar laipui chuan Jal Jeevan Mission hnuaiah Odisha state tan cheng vaibelchhe 3,323 an ruahman a, kum hmasa lam aiin sum pek hi a let liin a tam zawk tih Jal Shakti ministry chuan Pathianni khan a sawi.

Jal Shakti Minister Gajendra Singh Shekhawat chuan March 2024 hmain thingtlanga in zawng zawngah tap water supply an neih theih nan state sorkar chu kawng engkimah puih an inhuam tih a sawi.

"Kum 2021-22 chhung atan Odisha hi Jal Jeevan Mission hnuaiah sum pek chu Rs vbc 3,323 ah tihsan a ni a, kum 2020-21 khan Rs vbc 812.15 pek a ni," tiin ministry chuan a tarlang.

August 15, 2019-a Jal Jeevan Mission tlangzarh a nih khan, thingtlanga chenna in vaibelchhe 19.93 zinga vaibelchhe 3.23 (17%) chauhin tap water connection hi an la nei a ni. Mahse hripui leng leh lockdown vanga kalphung mumala an kal thei lo chungin thla 22 liam ta chhung khan Jal Jeevan Mission hi theihtawpin kalpui chhunzawm zel a ni a, tunah hian in vaibelchhe 4.5 chuangten water connection hi an nei tawh tih ministry chuan a sawi.

Kum liamta chhung khan 23.5% in a pung hman a, thingtlanga chhungkua vaibelchhe 7.69 (40.6%) te chuan tap water connection an nei tawh tih a tarlang bawk.

Jal Jeevan Mission kalpui a nih tirh k han Odisha-ah chhungkua nuai 3.10 chiahin tap water connection an la nei a, mahse he misison kalpui a nih hnua report thar berah chuan chhungkua nuai 22.84 hnenah tap water connection hi pek thar a ni. Chhungkaw nuai 85.66 zinga nuai 25.95 (30.3%) in tap water supply hi an nei tawh a ni.