MP-in data a ennawn avangin hri vanga thi zat an pung

India ramah hri lengin ziaawm lam panin, hri kai thar leh thihpui zat pawh an tlahhniam zel. Ni eng emaw zat chu ni khata hripui vanga thi hi 1,000 hnuai lamah an awm tawh laiin, Thawhṭanni khan Covid-19 vanga thi zat hi nasa taka pungin mi 2,020 an tling.

Thawhṭannia hripui thihpui zat an punna chhan hi Madhya Pradesh-in a official data ennawn a, a hmaa hri vanga thi nia tarlan tel loh, mi 1,478-te a dah thar leh vang a ni. A hmain Maharashtra leh Bihar pawhin Covid vanga thi zat hi ennawnin, an lo siamṭha ve tawh bawk.

Madhya Pradesh-in a data a siamṭhatah hian June 30 thlenga hri vanga thi te a dah ṭha leh a ni. Hemi hma hian ram pumah ni khatah hri vanga thi zat hi kar thum dawn chu 2,000 hnuai lam an ni tawh a ni.

Thawhṭannia hri kai thar mi 42,443 hi ni 118 chhung hri kai an tlem ber ṭum a ni. Hri kai mek, active case pawh 4,31,315-ah tla thla tawhin, ni 109 chhunga a hniam ber ṭum a ni bawk. Active case hi hri kai hmuh chhuah tawh aṭangin 1.4%-ah a tlahniam tawh.

Ram chhung hmun tam zawkah hian hri leng hian ziaawm lam a pan chho a, hei vang hian state tam tak chuan khuahkhirhna pawh an thlahdul ṭan mek a ni. Hetih lai hian hmarchhak bialah chuan hri leng hi a la hluar a, hri kai thar an la pung zel. Hei vang hian nimin khan prime minister Narendra Modi chuan hmarchhak state pariat-a chief minister-te chu virtual meeting neihpuiin, an state dinhmunte a sawipui.