Tourist destination hawn leh biakzina kal Hri thehdarhtu lian tak an ni thei : IMA

Indian Medical Asso­ciation (IMA) chuan India ramah hri leng dinhmunin ziaawm lam pan chho mah se, tourist destination hawn leh biakzina kal (pilgrimage) phalsak chu hri leng thawh thumna thlen tirtu, hri thehdarhtu lian tak an ni thei tih a sawi.

Medical body chuan sorkar leh mipuite inthlahdah chho chu ngaihtuah a ngai hle tih sawiin, Covid-19 norm zawm loa punkhawmna awm ṭhinte chu an ngaimawh thu an sawi.

Khualzin tam zawk hip lut a, biakzina a ruala kal te, sakhaw thila punkhawmte chu chakawm tawhin mamawh hle mah ila, hetianga punkhawmna buatsaihte chu thla rei vak lo la nghah leh hret a la ṭul a ni, an ti.

Khawvel pum din­hmun leh hri leng tawhte atanga thil awmdan chhutin, hri leng thawh thumna chu thleng leh ngei tura ngaih an ni thu IMA chuan a sawi. "Hetianga hun harsa tak kan tawh mekah, mitinte hri leng thawh thumna lo thleng tur atana inbuatsaih a ṭul hle laiin, ram chung hmun tam takah sorkar leh mipuite an inthlahdah ṭan a, punkhawmte an buatsaih fo a ni. Hetianga lo inhawn leh, vaccine la lote pungkhawmnaa zalen taka lo awmtir hi Covid-19 hri leng thawh thumna thlen tura hri tidarh thei turte an ni," a ti. Hei vang hian state tinte hnenah mipui punkhawmna la buatsaih loh tur leh, vaccine pek chhuah chak zawka kalpui a, Covid-19 norm-te khauh taka kengkawh turin an ngen.