September aṭangin SII-in Sputnik V siam ṭan dawn

Russian Direct Investment Fund (RDIF) chuan nimin khan thuchhuah siamin Serum Institute of India (SII) chuan Russia siam Covid-19 vaccine Sputnik V chu an siam chhuak ṭan dawn tih an tarlang a, kum khatah vaccine dose maktaduai 300 an siam chhuak dawn tih an tarlang bawk.

July 4-ah khan Drugs Controller General of India (DCGI) chuan SII hnenah he vaccine enchhinna phalna license a lo pe chhuak tawh a ni.

RDIF chuan,"September-ah hian SII hmun aṭangin Sputnik vaccine batch hmasa ber chu siam chhuah theih beisei a ni. India ramah kum khatah vaccine dose maktaduai 300 vel siam chhuah tum a ni bawk. Technical transfer process peng pakhat atan SII chuan Gamaleya Center aṭangin cell leh vector sample a dawng tawh a ni. DCGI-in a pawmpui angin tunah hian bulṭan mek a ni tawh," tiin thuchhuah an siamah chuan an tarlang.

SII hian tunah hian Covishield, Oxford-AstraZeneca Covid-19 vaccine leh Covovax-te an siam chhuak mek a, UK-ah Codagenix enchhinna an nei mek bawk.

Russia siam Sputnik V hi tunah hian ram 67-in an pawmpui tawh a ni.

RDIF-in an thawhpui Dr Reddy’s laboratory chuan Sputnik V dose mtd 250 India rama zawrh turin a tifel tawh a, nimina tarlan a nih dan chuan karleh lamah chuan hei pawh hi pek chhuah ṭan an tum a ni.