India rama Covid-19 hri kai hmasa ber A positive nawn leh tih hmuhchhuah a ni

India rama Covid-19 hri kai hmasa ber, nikum January 30-a hri kai tih hmuh chhuah, Kerala mi medical student chu nimin khan coronavirus hri a kai tih hmuh chhuah leh a nih thu Kerala-a Thrissur district medical officer, Dr KJ Reena chuan a sawi.

Dr Reena hian he zirlai hi a zirna chhunzawm tura New Delhi-a kal tur chu a sample endik sak a ni a, RT-PCR hmanga endik a nih hnuah a positive tih hmuh chhuah a ni, a ti. Inah a inkhung hrang nghal a, taksa lamah pawh harsatna a nei lo tih a sawi bawk. Covid vaccine dose khatna a la tawh tih a chhungte chuan an sawi bawk.

He zirlai hi Wuhan university-a zirlai niin, nikum January 30 khan semester chawlh hmanga India-a a rawn haw chu hri a kai tih hmuhchhuah niin, India rama Covid-19 hri kai hmuh chhuah hmasa ber a ni. Kar thum dawn Thrissur Medical College Hospital-ah enkawl a ni a, February 20, 2020 khan a result-te ṭhain damdawi-in aṭang hian chhuahtir a ni.