PMJAY atana pawisa dah zahve chauh hmang
Sorkar laipui flagship health insurance scheme, Pradhan Mantri Jan Aarogya Yojana (PMJAY) atana sum dah zinga a zahve, cheng vaibelchhe 3,200 chauh hman a nih thu National Health Authority chuan a tarlang.
Khawvela sorkar hmalakna hnuaia healthcare scheme lian ber tura duan,PMJAY hi kum 2018, September 23 khan prime minister Narendra Modi chuan a hawng a ni. PMJAY hnuaiah hian natna leh enkawlna 1350 chuang a awm a, kum khatah Rs. 5,00,000 thleng hman theih tih a ni a, mi harsa zual chhungkua vaibelchhe 10.74 tana siam ni mah se, he scheme hnuaia inziak lut hi vaibelchhe 6 vel chauh an la awm.
Kum 2019-20 chhunga he scheme atana pawisa dah chu Rs vbc 6,400 a ni a, mahse ennawn a nih hnuah a zahve, Rs vbc 3,200 hman a nih thu a tarlan a ni. Kum 2020-21 chung atan he scheme tan hian Rs vbc 6,400 tho dah leh a ni.
Scheme hnuaia hospital inziak lut hi 21,000 a ni a, hospital-ah hian mi nuai 80.35 dahluh tawh an ni. Gujarat, Tamil Nadu leh Kerala state-ah he scheme-a inziak lut hi an tam ber a, West Bengal, Delhi, Odisha leh Telangana-te chuan he scheme hi an hmang lo thung.