J&K-ah internet service titawp

India aṭanga inlakhran duhtuten sipaite silai hmehpuaha civil mi pa­hnih an thih vanga lung­awi lohna an lantir vangin nimin khan Jammu and Kashmir-a hmun eng emaw zatah internet service tihtawp a ni.

Syed Ali Geelani, Mirwaiz Umer Farooq leh Muhammad Yasin Malik-te kaihhruaiin Joint Resistance Leadership chuan Kashmir Valley pumah nawrh hi an huaiahawt a ni. Buaina a punlun zel tur venthawn thilah Srinagar bakah Kashmir Valley-a district pali-ah internet service hi tihtawp a ni.

Nawrh huaihawt vang hian dawr leh sumdawnna hmun tam zawk chu khar a ni a, public transport-te pawh an tlanchhuak lo. Mahse private motor-te erawh tlanchhuak hmuh tur an awm thung.

Kar kalta Inrinni khan security force-te chuan Shopian district-ah lunga security force-te tawngtu, mipui lungawi lo pungkhawmte hnawhdarh nan silai an hmetpuak a, an silai hmehpuahah hian mi pahnih an thi a ni. He thil thleng chungchang hi chhui chiang turin Chief Minister Mehbooba Mufti-i chuan thupek a tichhuak nghal a, Inrin­ni vek khan union defence minister Nirmala Sitha­raman pawh telephone-in a be nghal a ni.

Tualchhung mite chuan mipuite leh sipaite an innawr ṭan chauh tihah sipaite hian silai hi an hmetpuak mai niin a sawi a, mahse sipai lam chuan mipuite hian nasa taka lunga tawngin, sipai zingah hliam tuarte an awm a, an motor-te pawh a chhe nasa a, hei vang hian loh theih loha silai hmehpuah a ngai ta niin an sawi thung.