PM zuitute hming puang turin hriattir

Chief Information Commissioner RK Mathur chuan Prime Minister Office (PMO) hnenah Prime Minister Narendra Modi-an ram pawn lam a tlawha a zuitute chu an hming puangzar turin a hriattir.

PMO chuan PM zuitute hming puanzar hi national security atan a him tawk lo nia sawiin a ṭha lo niin a sawi a, mahse he a chhuanlam hi Mathur chuan a pawmsak lo. Mathur chuan PMO chu security mi leh sa leh, PM security chungchang nena inzawmna neite hming erawh puanzar loh a phalsak thung a, mahse security lam nena inkaihhnawhna nei lo, non-government person, ram danga PM a zinnaa zuitute hming chu puanzar an ni tur a ni, a ti.

Activist pahnih - Neeraj Sharma leh Ayub Ali-te chuan Central Information Commission hnenah hian rampawn lama PM a zinchhuaha a zuitute hming leh nihna kimchang hi Right to Information (RTI) hmangin an zawt a ni.

Sharma hian ram pawn lama PM zuitu zinga private business CEO leh official-te list a dil a, Ali hian PM chenna in leh office thla khat chhunga sum senral te, PM meeting neihpui theih dan te, PM-in a chenna leh office-a meeting a neih zat te, inthlan vuakveta public meeting-a a thusawi zat te, heng atana sorkarin sum a sen zat te a zawt a ni. Sharma hian RTI application hi nikum July thla khan a thehlut a, Ali hian kum 2016 April thla khan alo thehlut tawh a ni. An zawhna te hi hun rei tak chhan loah a awm hnuah, Mathur chuan PMO hnenah hian ni 30 chhunga chhanna pe turin a hrilh ta a ni.