Parliament Budget session tan a ni

Parliament budget session chu nimin aṭang khan ṭan a ni a, session ṭan ni hian President Ram Nath Kovind chuan Lok Sabha leh Rajya Sabha joint sitting hmaah thu a sawi.

Nimin khan Parliament in hnihah hian Economic Survey 2018 pharh nghal a ni bawk. Economic Survey hi Union budget kalpuina tura pawimawh tak a ni a, financial year kal mek chhunga ramchhug economy dinhmun leh sorkar sum hman dan tarlanna a nih piah lamah, Union Budget 2018 kalphung duanna tur atana thil pawimawh tak a ni tel a ni. Union Budget hi February 1-ah finance minister Arun Jaitley-an a pharh ang.

Parliament Budget Session hi thawh hnihah neih a ni dawn a, session thawh khatna hi February 9-ah zawh a ni ang a, a thawh hnihna chu March 5-April 6 chhungin neih a ni dawn a, he hunah hian finance bill-te tihfel a ni ang.

Budget session hawngtu, President Kovind chuan kum li kalta chhunga sorkar laipuiin hmeichhia leh loneitute chawikanna tura a hnathawh hrang hrangte a tarlang a, finance field lama sorkar hmalaknate a sawichhuak bawk. President chuan hmeichhiate chawikan a ṭul thu te sawiin, sorkarin faina beihpui thlak hna a kalpui chungchangte a sawilang a, pawn lama inthiar ṭhin tihbo a nih theih nana mipuiten inthiarna in an neih ṭheuh theihna tura sorkarin scheme a siam thute a sawi bawk.

Budget session chhung hian Lok Sabha-ah bill 28 leh Rajya Sabha-ah bill 39 pharh a ni ang. Bill pharh tur zingah hian triple talaq kaihhnawih Muslim Women (Protection of Rights on Marriage) Bill 2017, Codes of Wages Bill 2017 leh Rights of Children to Free and Compulsory Education, 2017-te pawh a tel dawn a ni.

Hun rei tak tihkhawtlai tawh Transgender Persons (Protection of Rights) Bill, 2016 leh Surrogacy (Regulation) Bill, 2016-te chu Lok Sabha-ah sawiho a ni ang. Kum 2017 Winter Session-a Lok Sabha-a pass tawh, triple talaq bill chu Rajya Sabha-ah ngaihtuaha ni bawk ang.

Nimina Parliament-a Economic Survey 2018 pharhah, sorkar kum kallai meka ram economy ṭhanna chu 6.75% a nih thu leh, kum 2018-19 ah chuan 7–7.5% a ṭhan beisei a nih thu tarlan a ni. Nikum aṭanga sorkar laipuiin Goods and Services Tax (GST) a kalpui chungchang zirchiannaah, GST kalpui a nih hnuah indirect taxpayer chu 50%-a a pun thu tarlan a ni. Kum 2016-17 chhunga Gross Value Added (GVA) ṭhanna chu 6.6% niin, kum 2017-18 ah chuan 6.1% ni tura beisei a ni. Survey chuan kum thum kalta chhung khan India ram economy ṭhanna chu chawhrualin khawvel pum huap ṭhanna aiin 4% velin a sang zawk niin a tarlang.