NPR hnuaiah Indian citizen nihna finfiah kher dawn lo

Ministry of Home Affairs (MHA) chuan National Population Register (NPR) kalpuina hnuaiah, India khua leh tui dik tak an nihna finfiahna dil kher an ni dawn lo tih a sawi.

 

Nimina Lok Sabha inkhawmah hemi chungchang hi sawichhuakin, NPR hnuaiah khua leh tui an nihna finfiahna dil kher an ni dawn lo a, document engmah lakkhawm a ni dawn lo a, Aadhaar number lo pek kher pawh a ngai dawn lo, tiin union minister of state for home Nityanand Rai chuan a sawi a ni. NPR hi chhungkua leh mimal awm zat update leh lakkhawmna tur a ni, a ti. 

NPR 2020 kalpuina tur hian sorkar laipui chuan instruction manual pawh a buatsaih tawh tih sawiin, he hna buaiputu enumerator leh supervisor-te chu ṭha taka lo thawhpui turin mipuite a ngen.