Congress-in President thusawi sawisel

Congress Party chuan Thawhṭanni Budget session ṭanni-a Parliament joint sitting hmaa President Ram Nath Kovind-a thusawi chu sawiselin, thu dik tawk lo a sawi avangin pawi a tih thu an tarlang.

Congress party thupuangtu Anand Sharma chuan President-in sorkar hnathawh leh hlawhtlinna chungchang a tarlan chu dik tawk lo leh awmze nei lo niin a sawi.

Sharma chuan, "President-in Parliament in hnih hmaah thu a sawiah thu dik tawk lo a sawilang hi a pawi hle a ni" tiin, Prime Minister Narendra Modi leh a kaihhruai sorkar chuan India mipuite hnena a lo tiam te chu tihhlawhtlin vek niin a sawi a, mahse hei hi thudik tak nen chuan thil inpersan tak a ni, a ti.

BJP kaihhruai NDA sorkarin nikuma hmanhmawh taka Goods and Services Tax (GST) a hman chu fel tawk lo a awm a, hei vang hian GDP pawh a tlahniam nasa a, ṭhalaite tana hna tam zawk siam an tiam pawh tihpuitlin a ni lo niin a sawi. PM thutlukna mumal lo tak avangin mi vaibelchhe thumin hna an chan phah a ni, a ti. Sorkar laipui chuan a thutiamte a bawhchhia a, mahse he a nihna dik tak hi a phat zel avangin thil a siamṭha thei lo ang, a ti.

Sharma chuan Modi-a kaihhruai sorkar chu ram mipuite bumah puhin, thil awm dan dik tak thupah a puh. Kum 2014 inthlanpui neih dawna a thutiam a tihhlawhtlin loh chhante chu mipuite hrilh turin a phut bawk.

President chuan sorkarin eirukna umbo tuma hma a lak dante a sawilang a, mahse Congress party chuan sorkar hian a thiltih hi a la thutak tawk lo nia a ngaih thu a sawi. Tun thlenga Lokpal ruat fel a la nih loh thu sawiin, kum li zet Modi leh a kaihhruai sorkarin Lokpal an ruat theih lohna chhan a zawt let a ni.

Congress party bakah epty party dangte pawhin sorkar laipuiin Muslim hmeichhiate zahawmna humhalhna tur te, eirukna tibo tura hma a lak dan leh loneitute harsatna chinfelna tura a hmalakna nia a tarlante chu an sawisel bawk.