Jyotiraditya Scindia thubuai ngaihtuah ṭha leh dawn
Congress Party aṭanga banga Nilainia BJP zawm leh nghal, Jyotiraditya Scindia laka forgery case thubuai thehluh tawh chu Madhya Pradesh Economic Offences Wing (EOW) chuan a ngaihtuah ṭhat leh tur thu a tarlang.
Jyotiraditya laka thubuai thehluh hun hi kum 2014 March 26 daih tawh kha a ni a, rei fe an chhui hnuah kum 2018 khan tihtawp a ni. He a thubuai la chhui zawh loh hi chhui leh turin Surendra Shrivastava chuan Ningani khan Economic Offences Wing hnenah cpmplaint a thehlut a ni. Hemi bawhzui tur hian EOW chuan an chhui tur thu hi an tarlang ta a ni.
Kum 2009-a Mahalagaon hmuna Scindia leh a chhungten an ram hralh chu document dik lo siamah puh an ni. Document-a a zau zawng an tarlan aiin an ram hralh hi sq feet 6,000 in a zim zawk nia sawi a ni a, hei vang hian Jyotiraditya leh a chhungte lakah hian thubuai ziah luh a nih thu EOW chuan a tarlang bawk.
Kamal Nath-a'n floor test hmachhawn inhuam
Madhya Pradesh chief minister Kamal Nath chuan Jyotiraditya Scindia-a'n Congress chhuahsanin BJP zawm mah se a kaihhruai sorkar chuan thlawptu a la ngah tawk tih a sawi a, House-a fiahna hmachhawn pawh an inhuam tih a sawi.
Congress chuan Scindia thlawptu, Congress MLA hel 22 zinga 19 chuan BJP an zawm ve dawn lo tih a lo sawi tawh a, mahse heng MLA-te hi BJP chuan thlem chhuah ngei tumin an hreng mek a ni, a ti.
Kamal Nath chuan nimin khan governor Lalji Tandon hmuin, state chhung politics dinhmunte a sawipui. Bengaluru-a an party MLA ṭhenkhat, BJP-in an hren mekte chhuah tura inrawlh turin Governor hi a ngen. CM chuan March 16 aṭanga Assembly session neih ṭan turah, a kaihhruai sorkar chuan thlawptu a la ngah tawk tih fiahna hmachhawn a inhuam thu a sawi bawk.
Scindia'n nomination a file
Jyotiraditya Scindia chuan nimin khan Bhopal-ah thla leha Rajya Sabha inthlan awm tur atan BJP hminga ding turin nomination a file.
Nomination a file lai hian MP hlui Shivraj Chouhan leh BJP hruaitu dangte'n an ṭawiawm a ni. Scindia hian March 10 khan Congress chhuahsanin BJP a zawm a, a mah thlawptu MLA dang 22-te chuan Congress an chhuahsan ve nghal bawk.