Zirlai nawrh huaihawtte hmaah DSP inkaphlum

Punjab-a Faridkot Deputy Superintendent of Police (DSP) pakhat chu Thawhṭanni khan zirlai nawrh huaihawtte hmaah a pistol-in a inkaphlum.

Thawhṭanni khan Faridkot-ah zirlaite chuan ni rei vak lo liamtaa zirlai ṭhenkhat kutthlak an nih chungchang leh, police-te chetdana an lungawi lohna lantirin campus-ah nawrh an huaihawt a ni. Zirlai pungkhawmte hian SHO laka action la turin thuneitute an phut bawk.

Kum 50 mi, DSP Baljinder Singh Sandhu hi nawrh huaihawtna hmunah hian kalin, zirlaite chu an nawrh titawp turin a ngen a ni. Zirlai ṭhenkhat chuan DSP chu a rorel dan fel tawk lo nia puhin, nawrh thlawp lo zirlai pawl dangte a ṭan niin an lo puh a ni. Hetianga an puhna hi DSP hian a la na hle a, a pistol pai chuan a lu-ah a inkap ta nia sawi a ni. A silai mu leng hian a bula police pakhat pawh fuhin hliam na tak a tuar a ni.

Sandhu hi Guru Gobind Singh Medical Hospital panpui nghal ni mah se, damdawi-in thlen hmain a chatthla hman a ni. Sandh hian a nupui leh a fapa pakhat a kalsan a ni.