Jammu & Kashmir: Farooq Abdullah a zalen ta

Jammu and Kashmir thuneitute chuan nimin khan thupek tichhuakin Public Safety Act (PSA) hnuaia an hren, chief minister hlui Farooq Abdullah hrenna chu an titawp.

Srinagar MP hi a chenna in Gupkar Road, Srinagar-ah Article 370 nuaibo ni, August 5 aṭang khan hren a ni a, a in chu subsidiary jail-a puan zui a ni hial. J&K thuneitute hian September 15, 2019 khan Farooq Abdullah hrenna hi an pawtsei a, December 13, 2019 khan thla thum dang an pawtsei leh bawk. Mahse thla thum a ral leh hmain an hrenna hi an sut leh ta a ni.

PSA hnuaia hrenna hi Srinagar District Magistrate thupeka kalpui a ni a, Zirtawpnia thupek tihchhuah a nih rual hian hrenna hi an titawp a ni. Chief minister hlui tho Mehbooba Mufti leh Omar Abdullah-te erawh hren chhunzawm an la ni thung. Farooq Abdullah hi thla sarih lai a inah hian hren a ni hman a ni.