Hri leng thawh hnihnaah hri vanga thi nuai 2.5 tling

India ramah Covid-19 hri leng thawh hnihna thlen chhunga hripui vanga thi chu mi nuai 2.5 chuang an tling tawh. A thawh khatna ai khan hri kaihhnawih vanga thi hi nuai khat chuangin an tam zawk a ni.

March 1 kha India rama hri leng thawh hnihna inṭan hun anga chhiar a ni a, Thawhlehni zanlai thleng khan hri leng thawh hnihna chhunga thi hi nuai 2.54 an awm tawh a ni. March 1 hma kha hri leng thawh khatna anga chhiar a ni a, hemi chhung hian hripui vanga thi mi 1.57 chuang chhinchhiah a ni bawk.

State tam tak chuan Covid-19 thawh hnihna chhunga thi zat, a hmaa an la telh lote chu ennawnin an belhkhawm ṭha leh a, hei vang hian nitina hri vanga thi tlem zel mah se chhinchhiah erawh an la tam rih hle a ni. Thawhṭanni khan Madhya Pradesh chuan Covid vanga thi, a hmaa an la telh loh mi 1,481 an telh belh leh a ni.

Ni 10 liam ta chhunga India rama Covid vanga thi mi 9,733 zinga 3,580 te chu tihkhawtlai, backlog death an ni. Hemi hma ni 10 dang ralta chhung veka thi 10,478 zinga 2,133 pawh backlog death an ni.

Thawhṭanni khan ni 118 hnua hri kai thar an tlem ber (30,557) ni kan thlen hnuah, Thawhlehni khan pung leh deuhin hri kai thar 39,086 an awm. Hri vanga thi 624 awmin Thawhṭanni ai khan 178 in an tam zawk.

Kerala chu hri kai thar tam berna state a la nih chhunzawm a, mi 14,539 in hri an kai thar leh a ni. Ramchhunga hri kai hmuhchhuah thar hmun thuma ṭhena hmun khat chu Kerala-a hmuhchhuah an ni. Maharashtra-ah hri kai 7,243 an awm leh a, June 28 hnua an tlem ber ṭum a ni.Thawhlehnia hri kai hmuhchhuah thar zinga 55% chuang chu Kerala leh Maharashtra state ami an la ni.

Maharashtra chu hri vanga thi tam berna niin, thi 196 an awm. Kerala-ah thi 124 awmin, Odisha-ah thi 68 an awm bawk.