Boruak muanawm tak hnuaiah nawrh kan huaihawt dawn : Rakesh Tikait

Bharatiya Kisan Union (BKU) hotu Rakesh Tikait chuan Parliament monsoon session chhunga loneituten farm law thar duh lohna lantira nawrh an huaihawt leh tur chu boruak muanawm tak hnuaiah an nei dawn tih a sawi.

Hun rei tak farm law thar pathum duh lohna lantira nawrh huaihawt tawh, loneitute thawm hi hun eng emaw chen a reh deuh hnuah thar thawh leh an tum a, Parliament session chhungin Parliament building kawtah lungawi lohna hi lantir leh an tum a ni.

Parliament monsoon session hi July 19-August 13 chhunga neih tum a ni a, loneitute hian July 22 hian Parliament kawtah lungawi lohna hi lantir an tum a ni.

Rikait chuan,"Buaina siam loin, boruak muanawm tak hnuaiah nawrh hi huaihawt a ni dawn. House chhunga ro an rel laiin Parliament kawtah kan lo awm dawn a ni," tiin bus hmangin an nawrh tumna hmun hi an pan dawn a, bus fare pawh an pe thlap dawn tih a sawi bawk. Mi 200 vel an kal dawn niin a sawi.

Kumin Republic Day, January 26 khan loneitute hian lungawi lohna lantirna chi khat atan Delhi khawpuiah tractor rally an nei a, nawrh huaihawt zinga ṭhenkhat chu Red Fort-ah lut luiin, flag tarte an lo pawtthla a ni. Hmun ṭhenkhatah buaina a chhuak bawk a ni.

BJP kaihhruai NDA sorkarin farm law thar pathum, Farmers' Produce Trade and Commerce (Promotion and Facilitation) Act, 2020; Farmers Empowerment and Protection) Agreement on Price Assurance and farm Services Act 2020 leh Essential Commodities (Amendment) Act, 2020 a siam duh lohna lantirin loneitute hian kum 2019, November 26 aṭang khan lungawi lohna an lantir tawh a ni. State hrang hrang aṭanga kalkhawm, loneitute chu Delhi border-ah an inkulh a, sorkar laipui nen pawh inremna zawngin ṭum eng emaw zat inbe tawh mah se tun thengin inremna a la siam thei lo.