Kanwar Yatra neih phalsak vangin insawifiah turin UP hriattir

Supreme Court chuan Uttar Pradesh sorkarin hri leng kara Kanwar Yatra nei tura phalna a pek avangin insawifiah turin a hriattir.

Hri leng thawh thumna a thlen mai hlauhthawnna a awm mek laiin, Uttar Pradesh sorkar chuan mi tam tak punkhawmna tur, kumtina an neih ṭhin Kanwar Yatra chu July 25 aṭangin neih a phalsak a, hemi rual hian official-te chuan Yatra neih turah hian Covid guideline-te ṭha taka zawm a nih theihna atana thawhpui turin an ṭhenawm state-te an ngen nghal a ni. Kanwar Yatra-ah hian 'Kanwariyas' (Lord Shiva zuitu)-te chuan Haridwar-a Ganga lui aṭangin tui an la a, hei hi an awmnaa Shiva Temple-ah an hlan ṭhin a ni. Ganga luia tui la tur hian ram chhung hmun hrang hrang aṭangin mi tam tak an kalkhawm ṭhin.

Uttarakhand sorkar chuan Thawhlehni khan Covid-19 thawh thumna thleng thei laka invenna atan Kanwar Yatra hi a lo ṭhulh tawh a, a zawnin kum hnih a ṭhulh tawh a ni.

Kanwar Yatra hi kar hnih chhung neih ṭhin niin, Shravan thla July 25 bawr vela neih a ni tlangpui a, August thla chawlhkar hmasa ber thleng a awh ṭhin.