Defence Attaches (DAs) post 10 siam belh dawn

Defence minister Rajnath Singh chuan defence lama India ramin ralthuam a thawn chhuah tam theih nan leh ramdangte nena inkungkaihna ṭha a neih belh zel theih nan, ram 10-ah Defence Attaches (DAs) post 10 siam belh a nih dawn thu  a sawi.

India-in defence lama hma a sawn theih nan leh ralthuam thawn chhuah lama hma a sawn theih nan, sorkar laipui chuan kawng thar dap zelin, DAs kaltlangin India defence hmasawn tir zel tum a ni. DAs atan hian a bika fund siam a ni a, he fund kaltlang hian ram 34-ah India ralthuamte thawn an nih theih nan hmalak tum a ni bawk.

Thawhṭanni khan New Delhi-ah Defence Attachés Conference vawi thumna hman a ni a, he hunah hian Singh chuan vawiin aṭanga hman ṭan tur India Defence Expo 2020 chungchang pawh sawi langin, defence expo lian ber a nih tur thu a sawi.

Defence Expo 2020 hi Uttar Pradesh khawpui Lucknow-ah vawiinah ṭan a ni dawn a, prime minister Narendra Modi chuan a hawng ang.