SC leh HC judge-te hlawh tisang dawn

Supreme Court leh High Court-a judge-te hlawh tihsanna chu President Ram Nath Kovind chuan a pawmpui tawh a, Parliament-ah bill hi pharh a ni thei tawh dawn a ni.

Judge-te hlawh tihsanna tur duanah hian tuna an hlawh lak mek aṭanga a let deuhthaw tihpun rawt a ni. Chief Justice of India hlawh, thla khata cheng nuai khat chu cheng nuai 2.80-ah tihsan a ni dawn a, Supreme Court judge leh high court chief jutice-te hlawh, Rs 90,000 chu cheng nuai 2.50-ah tihsan a ni dawn bawk. High court judge-te hlawh Rs 80,000 pawh cheng nuai 2.25-ah tihsan a ni bawk ang.

Judge-te hlawhbi tihsanna tur hi 7th Pay Commission-in all-India service in officer-te hlawhbi thar tur a siam zulzuia siam a ni a, January 1, 2016 aṭanga hman ṭan tur a ni.

High Court and Supreme Court Judges (Salaries and Conditions of Service) Amendment Act, 2018 chuan house rent allowance leh sumptuary allowance pek zat pawh a ennawn dawn bawk a ni.

Kum 2016 khan hetih laia Chief Justice of India TS Thakur chuan sorkar laipui hnenah Supreme Court leh high court judge-te hlawh tisang tur hian ngenna a lo thlen tawh a ni. Supreme Court-ah hian judge 31 an awm theih laiin tunah hian judge 25 an awm mek a ni. High court 24-ah judge awm thei zat 1,079 zingah judge ṭanglai 682 an awm mek bawk. Hlawhbi siamṭhat tur hi judge pension tawh 2,500-te pawn an chhawr dawn a ni.