Exam result chhiat vangin zirlaite lungawi lo

Calcutta University hnuaia BA Part I result tihchhuahah art stream-ah zirlai zinga 50% chuang zet an fail a, zirlai fail-te hian an answer paper-te en ṭha leh tura phutin lungawi lohna an lantir.

University-in BA Part I exam a tihchhuahah hian art stream-a zirlai 64,543 zingah 27,475 chauh an pass a, fail hi 57% zet an tling a ni. Science stream-ah chuan zirlai 15,125 zingah 10,738 pass-in, 71% in an pass a, mahse hei pawh hi kum nga chhunga pass percentage chhiat ber ṭum a ni.

West Bengal sorkar chuan zirlaite thil phut hi pawm theih a ni lo tih sawiin, Education Minister Partha Chatterjee chuan result chhiat chungchangah CU thuneitute pawh meeting a lo neihpui fo tawh niin a sawi. Mahse zirlaite pawhin mark ṭha tak hmu tura lehkha zir ṭhat chu an mawhphurhna a ni tih an hriat a pawimawh thu a sawi a, zirlai fail-te'n mark ṭha hmuh phut vanga nawrh an huaihawt ngawt chu thil dik a ni lo a ni, a ti.

Calcutta University hnuaiah hian college 164 a awm a, heng zinga 78 chu Kolkota khaw chhunga awm niin a bak chu Howrah leh South 24 Parganas district-a awm an ni.