Delhi-a containment zone 58,000 aṭangin 500-ah tlahniam tawh : Ram pumah hri kai thar 41,806 an awm belh leh

Covid-19 hri leng thawh hnihna chuan ziaawm lam a pan chho zel a, hri leng tuar nasa ber zinga mi, Delhi khawpuiah chuan thla hnih chhungin containment zone 58,000 awm chu 500 hnuailamah a tla thla tawh tih official data chuan a tarlang.

Containment zone te hi mihring chenna,residential area huamchhunga Covid-19 kai mi pathum emaw a ai tam emaw an awmin puan ṭhin an ni. Hemi huamchhunga awmte chhuah khap niin, pawn lam miten an tlawhpawh khap a ni bawk a, mass testing leh hnu chhui, tracking neih ṭhin a ni.

Delhi-ah hian March thla chawlhkar thumna vel aṭang khan hri kai hi nasa takin an pung chho a, April thla laihawl thleng khan nitin Delhi khawpui chhungah containment zone 1,500 siambelh ziah anga chhinchhiah a ni. May thla chanve thleng kha chuan Delhi-ah containment zone 58,000 chuang siam an ni hman. Mahse tunah chuan khawpui chhunga district 11-ah contaiment zone hi 472 chiah an awm tawh.

Containment zone te hi positive hmuhchhuah thar an awm tawh loh aṭanga ni 14 naah phelh leh ṭhin a ni.

Hri kai thar an pung leh hret
Ram pumah Nilaini khan Covid-19 hri kai hmuh chhuah thar mi 41,806 awm belh lehin, Thawhlehni aiin hri kai hi 7.7.% in an pung.

Nilaini hian hri kai enkawl dam mi 39,130 awmin, hripui thihpui mi 581 an awm leh bawk.

Hri kai enkawl mek, active case chu 4,32,041-ah a tla thla tawh a, hei hi hri kai hmuh chhuah tawh aṭanga 1.39% an ni. Hri kai enkawl dam rate-in hma a sawn zel a, nimin khan ram puma recovery rate chu 97.28% a ni.

Ni khata hri kai hmuh chhuah thar, daily positive rate chu a zawnin ni 24 chhung 3% hnuai lam a ni tawh bawk. Kar khat chhunga hri kai hmuh chhuah, weekly positive rate pawh 2.21% a ni mek bawk.

Covid-19 hri thihpui hi ram pumah mi 4,11,989 an awm tawh a, heng zinga mi 1,26,390 chu Maharashtra state-a mi niin, Karnataka-ah 35,989, Tamil Nadu-ah 33,557, Delhi-ah 25,021, West Bengal-ah 17,958 leh Punjab-ah mi 16,207-ten an thihpui tawh bawk a ni.

Union health ministry chuan India rama Covid-19 hri vanga thi zinga 70% chuang chu a hmaa natna benvawn lo nei tawhte an ni tih a sawi.