IT Act section 66A hnuaiah thubuai ziak lut tawh lo turin hriattir

Home Ministry chuan Nilaini khan State leh Union territory-a police station-te chu Information Technology Act Section 66A hnuaiah thubuai thar ziaklut tawh lo tur leh, he section hnuaia thubuai awmsate pawh hnukkir vek turin a ti.

Supreme Court chuan he section hi kum ruk liamta khan paih a ni tawh tih sawiin, hetichung hian section hnuaia ziahluh a la awm fo ṭhin chu mak an tih thu an sawi.

IT Act, 2000-a Section 66A hmang hian mi tu pawh, electronic kaltlanga thu, midangte deusawhna leh hmusitna lam hawi te, thu dik lo tih hriat reng mahse midangte harsatna thleng tur leh tihnawmnahna atana a tihchhuah chuan man a, kum thum thleng lung in tan leh pawisa chawitir theih a ni.

Mahse Supreme Court hian March 24, 2015 khan Section 66A mumal lo leh hman tlak tawk lo nia ngaiin alo paih tawh a ni. Mahse court-in a paih hnuah police station hrang hrangah he section hnuaia thubuai ziahluh hi a la awm fo nia sawi a ni.

MHA chuan SC order tihchhuah aṭangin Section 66A hi pawm a ni tawh lo a, hei vang hian he section hi hmang tawh lo turin police station tinte hrilh turin state leh UT-te chu a hriattir. He section hnuaiah thubuai ziahluh awmte pawh hnukkir vek turin home ministry chuan a ti bawk.

Civil rights group, People's Union for Civil Liberties (PUCL) chuan kar hmasa khan ramchhunga state 11-a trial court hrang hrangah Section 66A hnuaia thubuai ziahluh 745 tihkhawtlai a la awm mek thu Supreme Court-ah a lo hriattir tawh a ni.

SC chuan kum ruk liamtaa hman tlak loha a ngaih Section 66A hnuaia thubuai ziahluh a la awm fo mai chu mak an tih thu sawiin, sorkar chu kar hnih chhungin an insawifiahna thehlut turin a ti.