SC-in sedition law tihtawp a duh

SC hian sorkar laipui British awpna hnuaia awm hunlaia mi, sorkar leh thuneitute laka hela inpuh theihna 'sedition law' chu India Independence kum 75 hnuah mamawh a la ni zel em ni tiin sorkar laipui a zawt bawk.

Court chuan 'colonial-era' law hi police-ten sorkar sawiseltute beih letna atan an hmang sual fo tih a sawi. He dan hi British ho khan India ram zalenna tura beitute - Mahatma Gandhi, Bal Gangadhar Tilak leh midangte hrekbehna atana an siam a ni tiin, "Tun thlengin hman a la ṭul em ni?" tiin chief justice NV Raman chuan a zawt. Political party ṭhenkhat pawhin party dang beihna atan an hmang thei a ni, a ti.

Sokarin dan hlui tawh eng emaw zat a hnawl tawh laia, sedition law chungchang a enzui loh chhan chu a zawt a, sorkar lawyer attorney general KK Venugopal chuan he dan hi paih a ṭul kher lo a, mahse guideline-te erawh siam a ngai a ni, a ti ve thung.

Sedition law chungchanga petition hi major-general SG Vombatkere (Retd) thehluh a ni a, he dan hi ram danpui nena inmil lo a nih avangin tihtawp a ngai a ni tiin a sawi. He dan hian fundamental rights, free expression thlengin a khuahkhirh nia sawiin, ngaihtuah ṭhat a hun tawh hle a ni, a ti.