Thailand-ah NE India festival buatsaih dawn

Hmarchhak bial leh Thailand inlaichinna ṭha zawk siamna turin February 21 aṭang hian Bangkok-ah ni thum awh tur, North East India festival neih a ni dawn. He festival hi a vawi  hnihna tur niin discu­ssion, zai leh lama hun hman a nih dawn bakah hmarchhak bial thil­siamte pholan a ni dawn bawk. 

Festival chief organiser, Shyamkanu Mahanta chuan festival hmang tur hian hmar­chhak state hrang hrang aṭangin mi 500 velin Thailand hi an pan dawn tih a sawi. North East India festival vawi khatna chu hlawhtling taka buatsaih a lo nih tawh avangin, a vawi hnihna neih leh tur pawh hi an phur tawh hle tih a sawi a ni.

Mahanta chuan event an buatsaih tur hi sorkar laipuiin Act East policy a kalpuina peng zel a ni tih a sawi a, festival hawnna inkhawmah hian Thailand deputy prime minister Jurin Laaksanawisit bakah, hmarchhak state aṭangin Arunachal Pradesh, Manipur, Tripura leh Meghalaya chief minister-te pawh an tel dawn a, minister dang leh industrialist eng emaw zatin an telpui dawn bawk a ni, a ti. 

North East India festival-ah hian Indian singer leh band-te pawh an inlan dawn. India aṭangin Papon bakah Naga band Trance Effect, Arunachal Pradesh aṭangin David Angu & The Tribe, leh Meghalaya aṭangin Soulmate te an kal dawn a, Thai rock band Slot Machine pawh an inlan dawn a ni. 

Hmarchhak bial folk dance hrang hrang entir a ni dawn a, Arunachal Pradesh-in mask dance, Assam-in Bihu dance, Manipur-in Raas-leela, Mizoram-in Cheraw leh Nagaland-in Naga warrior dance an entir dawn a ni. Hmar­chhak biala thlai  leh thei tharchhuahte pholan a ni dawn bawk. 

Festival neih chhung hian “People to People Exchange programme” (P2P) pawh neih a ni dawn a, he huna tel tur hian hmarchhak aṭangin zirlai 50 chuang an kal dawn a, Thailand-a university hrang hrang an tlawh kual nghal dawn bawk. P2P program hi Thailand-a Indian ambassador, Suchitra Durai-in a kaihruai ang.