PM Modi-a'n state 6 CM-te meeting neihpui

Prime minister Narendra Modi chuan nimin khan nitina hri kai tam zualna state paruk - Tamil Nadu, Andhra Pradesh, Karnataka, Odisha, Kerala leh Maharashtra chief minister-te virtual meeting a neihpui.

Thawhlehni khan PM Modi hian hmarchhak state pariat chief minister-te chu hri leng dinhmunte sawipuiin meeting a lo neihpui tawh bawk.

Nimina meeting-ah hian PM chuan hri darh tur venna atana sorkawr laipuiin thupui bera a neih 'test, track, treat and teeka (vaccinate)' system chu chak taka kalpui turin state paruk CM-te chu a chah. Heng state parukte hi kar liam ta chhunga hri kai thar hmuh chhuah 80% leh thihpui 84% awmna an ni.

"Covid-19 hri leng thawh thumna dang tura theihtawp chhuah a ngai a ni. Sorkarin 'test, track, treat and teeka (vaccinate)' system a kalpui dan chu in hrechiang vek tawh a, hei hi ngaih pawimawh hmasak tur a ni," tiin Modi chuan a sawi a, hri leng chu thunun a nih thuai loh chuan buaina leh harsatna nasa zawk a thleng leh thei a ni, a ti. Test neih tam a pawimawh thu a sawi rualin, RT-PCR test tam chu a ngai tih a sawi bawk.

Sorkar laipuiin Covid fund atana Rs vbc 23,000 a dah chungchang pawh PM chuan sawichhuakin, heng sumte hi healthcare infrastructure tihchangtlunna atana hmang ṭheuh turin state tin chu a ngen tih a sawi. Sorkar laipui chuan state zang zawng tan PSA oxygen plant siamna tur pawh alo pawmsak tawh a ni, a ti.

Hri darh zel tur venna atan mipuiten kaihhruaina siamte an zawm ṭhat a ṭul thu sawiin, Modi chuan mitinte chu face mask vuah ṭha tur leh, social distancing dante zawm turin a ngen bawk.