Kanwar Yatra chungchang ngaihtuah ṭha turin UP sorkar hriattir

Supreme Court chuan hripui leng mek kara Uttar Pradesh-in mi tam tak punkhawm theihna tur, Kanwar Yatra neih phalna a pek chu ngaihtuah ṭha leh turin a ti.

Uttar Pradesh sorkar hian Covid-19 kaihhruaina zawm chungin Kanwar Yatra hi July 25 aṭangin neih an tum tih a sawi a, mahse justice RF Nariman leh BR Gavai awmna bench chuan right to life chu thil dang zawng aiin a pawimawh tih sawiin, ngaihtuah ṭha leh turin an ti a ni. Hemi chungchang hi karleh Thawhṭanniah court chuan a ngaihtuah leh ang.

Court chuan chief minister Yogi Adityanath kaihhruai Uttar Pradesh sorkarin yatra buatsaih a tum hi a ngaihtuah ṭha leh lo anih chuan, thupek tihchhuah hnan pawh a ṭul mai dawn niin a sawi.

Kumina neih ṭhin, Kanwar Yatra-ah hian Lord Shiva zuitu, Kanwariyas maktaduai 30 vel chu state hrang hrang aṭangin Haridwar-a Ganga lui tui la turin an kalkhawm ṭhin a ni. Nikum khan hripui leng vangin Yatra hi ṭhulh a lo ni tawh a ni.