Congress-in petroleum product-a chhiah tihniam turin phut

Congress party chuan ramchhunga fuel man sang zel chuan mitin a nghawng tih sawiin, petroleum product-a chhiah a lakte chu tihniam turin BJP kaihhruai sorkar laipui chu an phut tih an sawi.

Sorkar chu household product bika import duty tihniam tura phutin, mipui nawlpuite hmanraw mamawha GST lak pawh tihtawp rih turin Congress chuan an phut a ni.

Congress Lok Sabha member Shashi Tharoor chuan Chennai-a press conference a neihah, "Prime minister Modi kaihhruai sorkar-in kum sarih chhunga a rorel thiam loh leh dik loh vangin Indian economy chu nasa takin a tlahniam a, hei hian mitin khawsak phung thlengin a nghawng a ni. Tun hnaia survey neiha a chhangtu zinga 97% chu nikum nena khaikhinin an rethei zawk tih an sawi vek. Hei hi Modi-a sorkarin economy a enkawl thiam loh vang a ni," a ti.

BJP rorelna hnuaia petroleum product man sang zel chungchang pawh sawiin Tharoor chuan, "Kumin May 4 aṭang ringawt pawh khan fuel man hi ṭum 40 tihsan a ni tawh a, petrol man punna hi litre 1-ah rs 12 leh leh diesel punna hi Rs 10 a tling tawh a ni," tiin a sawi. BJP sorkarin petroleum product-a chhiah lak zat chu nikum khan cheng vaibelchhe nuai 4.2 a tling a ni, a ti. Congress kaihhruai UPA sorkar lai aiin chhiah aṭanga sum an lakluh hi a let thum zetin a tam zawk tih a sawi bawk.

Tharoor chuan kar leh aṭanga Parliament monsoon session neih turah, Congress party chuan ram chhunga fuel man sang zel chungchang hi an sawi chhuak ngei dawn tih a sawi. Hei bakah hian Covid hri dona kawnga sorkar hmalak dan ṭha tawk lo leh, vaccine indaih lohna thleng mek chungchangte pawh an sawi chhuak dawn tih a tarlang.