Afghanistan-ah Indian photojournalist Danish Siddiqui thah a ni

Pulitzer Prize hial pawh lo dawng tawh, Reuters hnuaia thawk Indian photojournalist Danish Siddiqui chu Ningani zanah khan Afghanistan-a Kandahar-ah reporting a tih laiin an that.

Danish Siddiqui hi Kandahar-ah hian ni eng emaw zat chu boruak thlithlaiin a awm tawh a, Ningani zanah Afghan security force zinga a chuang ve chu firfiakte'n beiin a thi ta a ni. Afghanistan Ambassador to India Farid, Mamundzay chuan hemi chungchang hi Twitter-ah puangzarin thi zingah Siddiqui a tel thu hi a sawi.

Kum 2018 khan Siddiqui leh a thawhpui Adnan Abidi-te chuan Pulitzer Prize an dawng a, India mi zinga Feature Photography-a Pulitzer dawng hmasa ber an ni nghe nghe. Rohingya refugee chungchanga an hnathawh avangin he chawimawina hi an dawng a ni.

Siddiqui hian Delhi-a Jamia Millia Islamia aṭangin Economics-ah degree a nei a, AJK Mass Communication Research Centre, Jamia aṭangin kum 2007-ah khan Mass Communication zo lehin a tirah chuan television news correspondent a ni ṭhin a, a hnuah photojournalism lamah inletin kum 2010 khan Reuters hi a zawm a ni.