All-party meeting-ah Farm law leh thil man sang sawi lang nghal

Parliament monsoon session, vawiin aṭanga neih tur atana lo inbuatsaihna kawng khat atan nimin khan sorkar chuan all-party meeting a ko a, party hrang hrang hruaitute an tel ṭha hle.

All party meeting-ah hian prime minister Narendra Modi, Lok Sabha-a deputy leader Rajnath Singh, parliamentary affairs minister Pralhad Joshi leh Rajya Sabha House leader Piyush Goyal-te an tel.

Congress party aṭangin Adhir Ranjan Chowdhury leh Mallikarjun Kharge, TMC hruaitu Derek O'Brien leh Sudhip Bandhyopadhyay, DMK aṭangin Tiruchi Siva leh TR Baalu, YSR Congress hruaitu Mithun Reddy leh Vijay Sai Reddy, BSF aṭangin Ritesh Pandey leh Satish Mishra, Samajwadi Party hruaitu Ramgopal Yadav, Apna Dal hotu Anupriya Patel, Akali Dal hruaitu Hasimrat Kaur Badal, Shiv Sena aṭangin Sanjay Raut, BJD hruaitu Pinaki Misra leh Prasanna Acharya-te an tel bawk.

Meeting-ah hian eptu party-te chuan hun rei tak chhung loneitu pawl hrang hrangin an lo dodal tawh, farm law thar pathum chungchang te, ram chhung thil man sang- a bikin petrol leh diesel man sang zel chungchang an sawichhuak nghal a ni. hei bakah hian NEET-a OBC tana reservation siam chungchang pawh ngaihtuah turin sorkar an phut nghal bawk a ni.

Sorkar lam aiawhte chuan session chhunga chhawpchhuah tur bill eng emaw zat an buatsaih thu leh, heng zingah hian ordinance panga a tel thu an sawi. Prime minister Modi chuan eptu party hrang hrangte rawtna neihte pawh ṭha taka an dawnsawn tur thu leh, ngaihtuah tura an duhte chu sorkar pawhin sawiho pui a inhuam reng thu a sawi. Parliament rorel inkhawm hi tluang taka neih a, ro rel tibuai thei zawnga awm lo turin a ngen nghal bawk a ni.

Palriament monsoon session hi vawiin aṭangin neih ṭan a ni dawn a, August 13 thleng a awh ang.