State/UT hnenah Covid vaccine vbc 41.99 pechhuak tawh

Union health ministry chuan state leh Union territory-te hnenah Covid-19 vaccine dose vaibelchhe 41.99 an pechhuak tawh tih sawiin, heng zinga vaccine dose vaibelchhe 2.56 chu state/UT leh private hospital-te hian an la kawl mek tih nimin khan a sawi.

Ministry chuan vaccine an pek chhuah tawh bakah hian dose 15,75,140 dang chu supply turin buaipui leh mek a ni tih a sawi bawk.

Nimin zing dar 8-a data tihchhuahah, state leh Union Territory (UT) tan vaccine dose vaibelchhe 41.99 semchhuah a ni tawh tih ministry chuan a sawi a, heng aṭang hian vaccine tih riral chhiar telin dose 39,42,97,344 hman ral a ni tawh a ni, a ti. Dose 2,56,71,246 hman lohin an la awm tih ministry chuan a sawi.

Covid-19 vaccination programme thawh thar hi June 21 aṭang khan kalpui ṭan a ni a, he programme hnuaiah hian sorkar laipui chuan puilting tan a thlawnin vaccine a semchhuak mek a ni. A hma khan kum 45 chunglam tan chauh vaccine hi a thlawna sem tura tih a ni.

Vaccine semchhuah runpui kalpuina hnuaiah hian sorkar lapui chuan vaccine siamtute hnen aṭangin an siamchhuah aṭanga 75% leisakin, hei hi state leh UT-te hnenah kum 18 chunglamte a thlawna pek vek an nihna turin a supply a ni.

Hri kai thar 41,157 awm belh leh
India ramah Inrinni khan Covid-19 hri kai thar 41,157 an awm belh leh a, ramchhungah hri kai mek, active case 4,22,660 an awm tih Ministry of Health and Family Welfare chuan nimin khan a puang. Hri kai tawh aṭanga chhutin hri kai mek hi 1.36% an ni.

Nitina hri kai hmuhchhuah rate hi 2.13% a ni mek a, kartina hri kai hmuhchhuah rate chu 2.08% a ni.

Inrinni leh Pathianni zing inkar khan ramchhungah Covid kaihhnawih vanga thi 518 leh dama chhuahtir 42,004 an awm. Heti hian, hri vanga thi 4,13,609 an awm tawh a, dama chhuahtir 3,02,69,796 an tling tawh bawk.

Indian Council of Medical Research (ICMR)-a Head of epidemiology and infectious diseases, Dr Samiran Panda chuan India ramah Covid-19 hri leng thawh thumna hi August thla tawp lam hian a lo thleng mai thei niin a sawi. Hri leng ṭum hnih lo thleng tawha tuar na vak lo state-te chuan khuahkhirhna mumal taka an kenkawh loh chuan hri leng thawh thumnaah hi chuan a nghawng na zawk an tuar ve thei dawn a ni, a ti.

Dr Panda chuan, "State tinte'n uluk takin hripui leng hi zirchiang se, an dinhmun zir zelin thuthlukna an siam tur a ni. State ṭhenkhatah chuan Covid-19 thawh khatna leh thawh hnihnain nghawng a neih nat lohnate a awm. Mahse khuahkhirhnate uluk taka an zawmṭhat loh chuan hri leng thawh thumna na zawk a thleng leh thei a ni", tiin a sawi.

Union Health Ministry chuan Inrinni khan Covid-19 kaite hian awlsam takin tuberculosis(TB) an kai thei tih an sawi. Hei hi coronavirus hri kai zingah TB natna vei hmuhchhuah an pung zel tih an hriat tak avangin an sawichhuak a ni.