Jaitley-an Union Budget 2018 a pharh

Union Finance Minister Arun Jaitley chuan nimina Lok Sabha inkhawmah Union Budget 2018 a pharh. Kum 2018-19 union budget atan hian cheng vaibelchhe nuai 24.42 ruahman a ni.

Arun Jaitley hian union budget a pharh ṭum nga-na leh, nakkuma Lok Sabha inthlanpui neih hmaa budget puitling a pharh hnuhnunna ber a ni. Nikum June thla aṭanga Goods and Services tax (GST) hman ṭan a nih hnua union budget pharh hmasak ber a ni bawk.

Budget pharhtu, Arun Jaitley chuan India chu khawvel ram hrang hrang zingah economy ṭhan chakna ber ram a nih thu a sawi a, kumin budget-ah chuan agricultural sector dah pawimawh zual a nih thu a sawi. Hei bakah hian healthcare leh education sector-te ngaih pawimawh a ni bawk. Personal income tax rate erawh tihdanglam a ni lo. Kum khatah Rs nuai 2.5 lalut chin chuan income tax an pek a ngai dawn lo, senor citizen zinga kum 80 hnuai lamah Rs nuai 3 chin lalut chu chhiah awltir an ni bawk. Kum 80 chunglamah kum khatah Rs nuai 5 lalutte chuan chhiah an awl bawk. Agriculture leh rural sector tihchangtlunna turin sorkar chuan cheng trillion 14.34 a dah a, agricultural market fund atan cheng vaibelchhe 2,000 a dah bawk. Food park 42 siam a ni bawk ang.

Jaitley chuan khawvela healthcare scheme lian ber tur, National Health Protection Scheme kalpui a nih tur thu a sawi. He scheme hi kumtinin ramchhunga mirethei chhungkaw vaibelchhe 10 velin an chhawr thei dawn a ni. Heng mite hnenah hian Rs nuai nga thleng pek an ni ang. TB natna veite chu ṭanpuina, thla khatah Rs 500 pek an ni ang a, hemi atan hian cheng vaibelchhe 600 dah a ni.

Budget-ah hian education sector tana hmalakna tur hrang hrangte a tarlang a, kum li chhunga education infrastructure leh technology tihchangtlun nan cheng vaibelchhe nuai khat ruahman a nih thu a sawi. Sorkar laipui chuan medical college thar 24 din a tum bakah, district hospital-te chu tihchangtlun a tum bawk. Hei bakah hian sorkar laipuiin Schools of Planning and Architecture pahnih din thar a tum thu a sawi. Scheduled Tribe-te tan Eklavya school din tum a ni bawk. Finance minister chuan Indian Railways budget atan cheng vaibelchhe nuai 1.48 dah a nih thu a sawi. Jailtey chuan Railways tihlen chu an ngaih pawimawh thu sawiin, rel kawng km 18,000 a thui chu a leta tihpun tum a ni thu leh, kum 2019 chhunga rel kawng thar km 4,000 a thui siam hman tum a nih thu a sawi. World-class rel siam tum a nih thu te pawh a tarlang a, rel station leh rel zawng zawngah Wi-FI leh CCTV t- dah chhoh zel tum a nih thu a sawi.

Jaitley chuan President hlawh chu thla khatah Rs nuai nga, Vice President hlawh chu Rs nuai 4 leh Governor-te hlawh chu thla khatah Rs nuai 3-ah tihsan a rawt bawk.

PAN chu April 1 aṭangin non-individual-te tan Unique Entity Number atan hman a ni tawh dawn a, Rs nuai 2.5 chung lam inthawnkualna turah PAN number chu neih tel ngei ngei a ngai tawh ang.

Finance minister-ten Parliament-a budget an pharh hian English hlirin an chhiar ṭhin a, mahse tun ṭumah hian Jaitley chuan Hindi a hmang thung. BJP kaihhruai NDA sorkar chuan budget pharh chungchang kalphung chu a lo tidanglam ṭhen tawh bawk. Budget hi British time milin tlai dar 5-ah pharh a ni ṭhin a, mahse hei hi Atal Behari Vajpayee kaihhruai sorkar khan chawhma dar 11-ah a sawn tawh a ni. Hemi hnu hian Narendra Modi kaihhruai sorkar hian budget phar hun, February thla tawpa neih ṭhin chu nikum aṭang khan February 1-ah a sawn hma a, hei bakah hian Railways budget a hrana pharh ṭhin pawh titawpin, Union Budget-ah hian a behtir a ni.

Prime Minister Narendra Modi chuan Jaitley-a budget pharh hi fakin, loneitute leh mipui nawlpuite hma khaw ngaitu, sumdawngte tana ṭha leh hmasawnna tur ngaihpawimawhna a ni, a ti.

Hetih lai hian eptu lam chuan Jaitley-a budget pharhah hian mi nawlpui tana han lawm viauna tur thil danglam engmah a awm lo niin an sawi. Finance Minister hlui, Congress hruaitu P Chidambaram chuan Budget 2018 chu lawmawm lo tak, nghawng ṭha lo tak nei tur a ni , a ti. Uttar Pradesh Chief Minister hlui Akhilesh Yadav chuan budget thar hian mi rethei, loneitu, kuthnathawktute a tilunghnur dawn hle a ni, a ti.