Union Budget-ah TDP lungawi lo NDA atangin inhnukdawk maithei

Union Finance Minister Arun Jaitley chuan Ningani, February 1 khan Lok Sabha-ah Union Budget 2018-a pharh a, budget thar hi BJP lamin an fak hle laiin NDA hnuaia BJP thawhpui Telugu Desam Party (TDP) chu an lungawi lo hle thung.

Andhra Pradesh Chief Minister Chandrababu Naidu kaihhruai Telugu Desam Party (TDP) hi NDA hnuaia BJP tih loha party lian ber a ni. Finance Minister Jaitley-an union budget a pharhah Andhra Pradesh tana sum a dah zatah an lawm lo hle tih sawiin, NDA-a awm chhunzawm tur leh tur loh pawh an ngaihtuah thuai dawn tih an sawi.

Arun Jailtey-an budget a pharh hnu lawkah AP CM leh TDP president Chandrababu Naidu chuan an party MP-te chu teleconference a neihpui nghal a ni, TDP MP-te hi Delhi-a Union minister of state for science and technology YS Chowdary-a inah an kalkhawm a ni.

TDP MP-te chuan budget pharh tak chu a lungawi thlak loh hle tih sawiin, AP Reorganisation Act-a sorkar lo intiam tawhnate engmah tarlan tel a ni lo, an ti. Visakhapatnam tana railway zone siam leh, an state khawpui thar tur Amaravati siamna tura sum dah chungchang pawh engmah tarlan a nih loh thu Naidu hi an hrilh a ni.

TDP chuan thlan tur pathum an nei tih an sawi a, chu chu thawhho chhunzawm zel te, MP-te banna thehluh tir te leh NDA-a thawhhona tihtawpte a ni tih sawiin, hemi chungchang hi Pathianni-a meeting-ah an ngaihtuah dawn tih an sawi.