Sorkar kum thar aṭangin 'ModiCare' kalpui dawn - Arun Jaitley

Union Finance Minister Arun Jaitley chuan Ningani-a union budget 2018 a pharhah, khawvela healthcare scheme lian ber kalpui a nih tur thu a lo sawi tawh a, he scheme hi sorkar kumthar aṭanga kalpui ṭan a ni dawn tih a sawi.

Healthcare scheme thar kalpui tur, National Health Protection Scheme (NHPS) hi ModiCare tia sawi a ni a, he scheme hmang hian mi rethei chhungkua vaibelchhe 10 chuang zet chu damdawi lama an inenkawlna cheng nuai nga thleng pek an ni dawn a ni.

Arun Jaitley chuan he scheme hi cashless a nih tur thu sawiin, reimbursement model chu a sum rulhna tur dil let chungchangah harsatna a awm fo avangin an hmang dawn lo tih a sawi. He scheme-in a huam chinte chu damdawi-ina an inenkawlna senso te sorkarin a tumsak dawn a, hei hian state hospital hrang hrang bakah private hospital thlan bikte a huam dawn a ni. Scheme kalpui dan tur hi NITI Aayog leh Health Ministry-in an duan mek thu sawiin, financial year tharah chuan a taka kalpui nghal theih a ni dawn tih a sawi. He scheme atan hian sorkar laipui chuan cheng vaibelchhe 2,000 a dah a, a ṭul dan azirin sum pawh pek belh a ni ang tiin Jaitley chuan a sawi.