BJP-in Bengaluru-ah 'Cow Yagna' buatsaih

BJP hnuaia bawng humhalhtu, Cow Protection Cell chuan nimin khan Karnataka-a Bengaluru-ah bawng humhalh pawimawh zia mipuite hrilhhriat nan 'Cow Protection Ashtayama Yagna' an buatsaih.

'Cow Protection Ashtayama Yagna' hi darkar 24 chhung buatsaih niin, Bengaluru chhim lamah neih an. He hunah hian state BJP hruaitu lu te an tel a, BS Yeddyurappa leh Bengaluru South MP Ananth Kumar-te pawh an tel.

Cow Protection Cell convener Siddhartha Goenka chuan bawng humhalh chu environment atan leh, rural economy atan thil pawimawh tak a ni tih mipuite hriattir an duh thu niin a sawi. An party tan bawng chu thil pawimawh tak a ni tih a sawi tel bawk. Dan loa sa talhna in tam tak siam a nih avangin Bengaluru-a luite pawh chu a bawlhhlawh nasa tawh hle niin a sawi. Hetianga a bawlhhlawhna chhan pakhat chu ram leilung humhalh loh vang a ni a, a chhan bulpui ber chu bawng humhalh a nih loh vang a ni, a ti.

Congress party chuan BJP-in yagna a buatsaih chhan chu sawiselin, mipuite vote hip nana ti niin a puh.

State Congress president G Parameshwara chuan BJP leh Congress chuan danglamna nasa tak an neih thu a sawi a, Congress chuan mi retheite dinhmun chawikan, zirna leh ṭhalai te hna siamsak dan te, dinhmun ngelnghet an neih theih dante an ngaihtuah a, mahse BJP chuan hengte hi an ngaihven ve lo niin a sawi.