Parliament monsoon session ṭan a ni : Eptute au buai vangin inkhawm titawp

Parliament monsoon session chu nimin aṭang khan neih ṭan a ni a, August 13 thleng session hi neih a ni ang.

Prime minister Narendra Modi chuan Lok Sabha inkhawmah rorel ṭan hmain a minister tharte chu House-ah hmelhriattir a tum a, mahse eptu member-ten ram chhung thil man sang zel leh, farm law duh lohna lantira loneitute nawrh huaihawt mek chungchangte sawichhuakin, an aubuai zui nghal avangin PM pawhin minister tharte hian a hmelhriattir thei lo a ni. Eptute au buai avangin Speaker Om Birla chuan tlai dar 2 thleng atan inkhawm a titawp lailawk. Inkhawm neih leh hnuah pawh eptu member-te hi rorel thei loa an aubuai leh avangin chawhnu dar 3:30 thleng inkhawm tihtawp leh a ni.

Rajya Sabha-ah pawh House chairman thusawi laiin eptu member-te chuan loneitute lungawi lohna leh thil man sang chungchang hi sawichhuakin an au buai nghal bawk a, rorel thei loa an aubuai zui avangin chawhnu dar 3 thleng inkhawm tihtawp a ni bawk.

Defence minister Rajnath Singh chuan eptu party-te chet dan chu demin, kum 24 Parliament member a nih chhunga a thlen vawi khatna a ni tih a sawi. "Minister pakhat emaw, 50 emaw pawh lakluh thar a nih a, Prime Minister-in minister thar hmelhriattirna a neih laiin House pum chuan mawi leh zahawm takin a lo dawngsawng ṭhin. Vawiina thil thleng hi a mawi loin a pawi hle a ni," a ti.

Rajya House leader, minister Piyush Goyal pawhin session ṭannia Lok Sabha leh Rajya Sabha-a eptu MP-te chet dan chu an dem thu a sawi.